Kide Ugariko Familien Espainiako Federazioak 3 seme-alaba edo gehiago dituzten familiei buruz egindako azken azterlanaren emaitzek erakutsi dutenez, familien % 31,7k zailtasunak dituzte hilaren amaierara iristeko, % 24,5ek gastuak murriztuz lortzen dute, % 12,2k aurrezkietara edo maileguetara jo behar dute, eta % 4k senide baten laguntza jasotzen dute.
Azterketak, Estatu osoko hainbat tokitako kide ugariko 1.800 familiari baino gehiagori egindako inkestekin osatuak, agerian utzi du kide ugariko familia gehien-gehienek zenbakiak egin eta beren edo besteren aurrezkiak erabiliz egin behar dutela aurrera beren behar guztiak ase ahal izateko. Hilaren amaierara iristeko arazoak kide ugariko 10 familiatik 7k dituzte, % 73k; horien artean, batzuek “hilaren amaierara iristeko zailtasunak” dituztela zuzenean diote (% 31,7), beste batzuek beren aurrekontua murriztu behar dutela, han-hemenka aurreztuz (% 24,5), zenbaitek aurrezkietara jo edo mailegu bat ere eskatu behar dutela (% 12,2), eta, azkenik, familia gutxi batzuek badutela nolabaiteko koltxoia gastuei aurre egiteko: senide baten laguntza (% 4) edo GKE batena (% 0,7).
Egoera batez beste 5 lagunez eratutako familia hauen diru-sarrerekin lotuta dago, gehienetan bi soldatarekin osatutakoekin (% 66). Familia gehienak 2.500 eta 3.500 euro bitarteko tartean daude (% 22,6), eta ondoren 2.000 eta 2.500 euro bitartekoan (% 17). Horien atzetik, familien ia herena (% 29,9) hilean 2.000 eurorekin baino gutxiagorekin bizi da, eta kopuru horrekin egin behar diete aurre oinarrizko gastuei: elikadura, higienea, arropa, hezkuntza, osasuna, garraioa eta abar, gehi etxebizitzari eta oinarrizko hornidurei, hala nola argiari, gasari, urari, etab. Hain zuzen ere, atal horretan eskatzen dituzte familiek deskontuak, oinarrizko hornidura horiek izan duten prezio-igoera etengabea dela eta, uste dutelako beren familiarentzako bigarren neurririk garrantzitsuena litzatekeela seme-alabagatiko laguntzen zenbatekoa handitu ondoren.
Alderdi ekonomikoa seme-alabekin lotuta dago, zalantzarik gabe, eta erabaki horretan faktore askok eragiten dute, baina dirua baldintzatzaile itzela da. Inkestaren arabera, kide ugariko familien erdiak baino gehiagok, % 51,9k, seme-alaba gehiago izango zituzketen, eta % 42,4k diote arrazoi ekonomikoengatik ez dutela egin, % 24,3k “beste arrazoi batzuengatik”, zehaztu gabe, eta % 13,5ek kontziliazio-kontuengatik.
Nahiz eta familia hauentzat kontziliazioa oso gai garrantzitsua izan oraindik ere, agian jaitsi egin da lanaren inguruko baliorik handieneko alderdien eskalan: egun, lehentasuna soldata eta lan-egonkortasuna dira (biak ere 6 puntutik 4,2rekin), eta, ondoren, kontziliazioa (3,8) eta seme-alabei laguntzeko neurriak (3,2).
Nolakoak dira kide ugariko familiak?
Seme-alaba kopurua. Azterlanaren arabera, kide ugariko familia gehienak (% 66) 3 seme-alabakoak dira, eta ume horiek eskola-adinean daude, zaharrenaren batez besteko adina 15 urtekoa baita. Ondoren, 4 seme-alabako familiak daude (% 16,1), eta 2 seme-alabakoak (% 7,6). Familiarik handienak gutxiengoa dira, 6 seme-alaba edo gehiago dituztenak (familia guztien % 4,8 besterik ez).
Berreratuak eta gurasobakarrak. Familia-osaerari dagokionez, berreratutako kide ugariko familiak, aurretiko harremanetan sortutako seme-alabak dituztenak, % 11,4 dira, eta % 6,5 familia gurasobakarrak. Inkesta bete dutenen % 1,6 alargunak dira, eta % 1,3 harrera-familia.
Erditze anizkoitzak. Erditze anizkoitzak direla eta, egoera hau oso hedatuta dago: % 16,8k erditze anizkoitza izan dute, % 15,9k bikiak eta % 0,9k hirukiak edo gehiago izanik. Desgaitasuna ere oso presente dago kide ugariko familietan, zehazki haien % 20,7n: kasuen % 67,5ean, seme edo alaba batek dauka, % 24,5ean gurasoetako batek, eta % 7,7an guraso eta seme-alabek.
Prestakuntza eta lana. Kide ugariko familiako guraso gehienek, % 56,2k, unibertsitate-mailako prestakuntza dute, eta % 8,7k baino ez dituzte lehen mailako ikasketak. % 41,6k sektore pribatuan egiten dute lan, % 25,8k sektore publikoan, eta % 9,7 autonomoak dira. Kide ugariko familiako gurasoen % 9 langabezian daude, eta % 10,4k ordaindu gabeko etxeko lanak egiten dituzte.
Etxebizitza. Kide ugariko familia gehienak 75-100 m2 bitarteko etxebizitzan (% 33) eta 100-150 m2 bitartekoan (% 32) bizi dira, eta gehienak hipoteka ordaintzen ari dira (% 59).
«Seme-alaba bakoitzeko laguntzak aurrerapena dira, baina asmo handiagokoak izan behar dira»
Belarrako familien legeak ugaritzat joko ditu guraso bakarreko familiak, eta 125 euro arteko errenta izango du.
«Esto nos enfrenta al doble de meses sin conciliar», alertan las familias numerosas
