Hirukidek bere bazkide gazteei propio eskaintzen dien sailetik, Hirugazte-tik, “Zuretzako gutun bat” ekintza solidarioa sustatu dugu, belaunaldiak lotzen dituena eta, bere bigarren edizioan, gure hasierako aurreikuspenak gainditu dituena.
Joan den irailean, Euskadiko ikastetxe publiko eta itunpeko guztiei idatzi genien Lehen Hezkuntzako 5. mailatik Lanbide Heziketara bitarteko ikasleak parte hartzera gonbida zitzaten. Aldi berean, adinekoen egoitza eta zentro ugarirekin harremanetan jarri ginen eta haietako batzuek, parte hartzeko, beren erabiltzaileen izenak eta pertsona horientzako gutunak pertsonalizatzen lagun dezakeen daturen bat helarazi zizkiguten. Ondoren, informazio hori ikastetxeetara bidalita, ikasleak pertsona jakin batentzat idazten ari dira eskutitzak. Haien erantzuna ikaragarria izan da.
Izugarrizko parte-hartzea
Iaz 17 ikastetxek eta 19 egoitzek parte hartu zuten, eta aurten lortu ditugun zifrek hunkitu egin gaituzte: 43 ikastetxetako 2.574 ikaslek gutun pertsonalizatuak idatzi dizkiete 51 egoitza eta eguneko zentrotako 1.869 adinekori.
Araban, 7 ikastetxetako 455 ikaslek hartu dute parte; Bizkaian, 17 ikastetxetako 1.187 ikaslek; eta Gipuzkoan, 19 ikastetxetako 932 gaztek. Gutunak, maitasunezko hitzez beteak, Arabako 13 egoitzatako, Bizkaiko 19 egoitzetako eta Gipuzkoako 19 egoitzetako adinekoentzat izan dira.
Oso emanaldi berezia
Abenduko bigarren eta hirugarren astean, eskutitzak eskura eman ziren, eta hartzaileekin une oso bereziak partekatu zituzten ikasleek. Askotan, pertsonalki irakurtzeko aukera izan zuten, eta, horri esker, esperientzia belaunaldien arteko topagune paregabea bihurtu zen. Gainera, bisita batzuetan, jarduera gehigarriak egin ziren, hala nola gabon kantak edo manikura eta eskuetako masajeak, estetikako heziketa-zikloetako ikasleen eskutik.
Hausnarketa oso positiboa
Ekimen honek erakutsi du, beste behin ere, keinu txiki batek eragin handia sor dezakeela. Gazte askorentzat, eskutitz bat eskuz idatzi duten edo egoitza bat bisitatu duten lehen aldia izan da, eta adineko askorentzat, urte asko ondoren jaso duten lehen gutuna.
Hirukidetik eta Hirugaztetik oso eskertuta gaude ikastetxeek eta egoitzek ekintza hau ilusio handiz hartu izanagatik eta haien dedikazioagatik. Parte-hartzaileen konpromisoak lanean jarraitzera bultzatzen gaitu, ekimen honek urtez urte hazten jarrai dezan. Hunkitu egiten gaitu jakiteak topaketa hauetan belaunaldien arteko zubiak sortzen direla eta hitz idatzietatik haratago doazen loturak sortzen direla. Azken finean, esperientzia hau itzelezko oparia da idazten dutenentzat eta gutunak jasotzen dituztenentzat.
